«ព្រះពុទ្ធសាសនាថេរវាទនៅសម័យកណ្ដាល»
ដោយសារតែសង្គ្រាមកើតមានមិនឈប់ឈរ
ដែលបង្កឡើងដោយប្រទេសជិតខាង មានសៀម និងយួន ព្រម ទាំងសង្គ្រាមក្នុងស្រុកនានាជាច្រើន បានបង្កឲ្យប្រទេសជាតិទាំងមូលត្រូវធ្លាក់ស្រុតបាត់កិត្យានុភាព
អធិបតេយ្យភាព និងឱនភាពនៅគ្រប់វិស័យទាំងអស់ ។ ក្នុងនោះព្រះពុទ្ធសាសនាបានហែលឆ្លងកាត់នូវព្រឹត្តិការណ៍សង្គមដ៏ស្មុគស្មាញ
នេះជាមួយពុទ្ធបរិស័ទចំណុះជើងវត្តទូទាំងប្រទេសផងដែរ ។ វត្តអារាម គម្ពីរដីកាត្រូវបានដុតបំផ្លាញ
និងវាយកម្ទេច ឯព្រះសង្ឃត្រូវបានគេធ្វើគុត ឬត្រូវគេបណ្ដេញចេញពីវត្តដោយគ្មានមូលហេតុច្បាស់លាស់ក្រៅពីការបំផ្លាញដោយមិន
រើសមុខ (ពីសំណាក់ប្រទេសយួន) ។ ទោះបីមានការព្យាបាទពីសំណាក់សត្រូវយ៉ាងណាក្ដី ក៏ព្រះពុទ្ធសាសនានៅតែ
តស៊ូយ៉ាងរឹងមាំជាមួយនឹងពុទ្ធបរិស័ទគ្រប់ស្រទាប់វណ្ណៈផងដែរ ។ ដោយសារតែសទ្ធាដែលកើតចេញពីជំនឿដ៏ជ្រះថ្លា
របស់ប្រជាជនខ្មែរ ទាំងព្រះមហា ក្សត្រ ទាំងមន្ត្រីរាជការគ្រប់លំដាប់ថ្នាក់ បានខិតខំកសាង
ជួសជុល និងធ្វើការរៀបចំ វត្តអារាមពុទ្ធសាសនាឲ្យមានដំណើរការឡើងវិញប្រកបទៅដោយស្មារតីសាមគ្គីដ៏ខ្ពង់ខ្ពស់
។
ចុងសម័យអង្គរ ព្រះពុទ្ធសាសនាមហាយាន និងព្រហ្មញ្ញសាសនាចាប់ស្រុតចុះគួរឲ្យកត់សម្គាល់
ហើយពុទ្ធ សាសនាថេរវាទ ក៏ចាប់មានឥទ្ធិពលយ៉ាងធំធេងនៅក្នុងស្ថានភាពដែលមានការប្រែប្រួលទាំងនេះ
។ លោក ហារី បេន ដា បានចាត់ទុកថា ព្រះពុទ្ធសាសនាថេរវាទនៅប្រទេសខ្មែរនៅចុងសម័យអង្គរ
និងសម័យក្រោយអង្គរបន្តិចថាជាជំនឿ នៃចលនាប្រជាជនទូទៅ ពោលគឺសាសនានេះមានបង្គប់នូវគំនិតប្រឆាំងនឹងរបបអភិជន
។ ទស្សនៈរបស់លោកហាក់ ដូចជាឆ្លើយស្របទៅនឹងទស្សនៈរបស់លោក ឡឺក្លែរ ដែលជឿថា «ព្រះពុទ្ធសាសនាជាកត្តា
ដែលធ្វើឲ្យមានការលុប បំបាត់នូវប្រព័ន្ធវណ្ណៈ» ។
ពង្សាវតារជាច្រើនបានបង្ហាញថា រជ្ជកាលរបស់ព្រះបាទធម្មរាជា (១៤៨៦‑១៥០៤)
ថាជាយុគមាសនៃការ រីកចម្រើនខាងជំនឿព្រះពុទ្ធសាសនា ។ ស្ដេចអង្គនេះបានឧបត្ថម្ភដល់ការកសាងនិងពង្រឹងព្រះពុទ្ធសាសនាយ៉ាងខ្លាំងក្លា ដោយបានលើកលែងពន្ធអាករពីប្រជានុរាស្ត្រចំនួន៣ឆ្នាំថែមទៀតផង ។ ព្រះអង្គក៏ជាមហាក្សត្រដែលមានចំណេះ
ដឹងខាងពុទ្ធសាសនាមួយព្រះអង្គផងដែរ ។ នៅរវាងឆ្នាំ ១៤៩៦ ព្រះអង្គបានចេញរាជបញ្ជាឲ្យគេផ្ទេរព្រះសារីរិកធាតុ
ទាំងឡាយរបស់ព្រះសម្មាសម្ពុទ្ធពីចេតិយរបស់ព្រះថោងនៅអង្គរ មកតម្កល់នៅចេតិយថ្មីនៅភូមិខ្វាវព្រះធាតុ
នៅជិតភ្នំ សន្ទុក ខេត្តកំពង់ធំវិញ ។
ក្រោយពេលព្រះបាទអង្គចន្ទសោយទីវង្គតទៅ ដោយគ្មានរាជបុត្រស្នងរាជ្យ
ប្រទេសអណ្ណាមបានឆ្លៀតឱកាស លូកដៃចូលក្នុងកិច្ចការរាជវាំងខ្មែរ ដោយបានលើករាជបុត្រីមួយអង្គរបស់ព្រះអង្គចន្ទ
ព្រះនាម អង្គម៉ី ឲ្យឡើងសោយ រាជ្យស្នងព្រះបិតា ។ ឯប្រទេសអណ្ណាមក៏ឆ្លៀតឱកាសគ្រប់គ្រងប្រទេសកម្ពុជាតែម្ដងទៅ
តាមរយៈការចាត់បញ្ចូនមេទ័ព មួយរូបឈ្មោះ ទ្រឿង មិញយ៉ាង ឲ្យមកគ្រប់គ្រងមើលការខុសត្រូវនៅកម្ពុជា
។ គោលនយោបាយវៀតណាមភាវូបនីយ កម្មត្រូវបានចាប់ផ្ដើមធ្វើនៅទូទាំងប្រទេសកម្ពុជា ដោយដាក់បញ្ចូលនៅទំនៀមទម្លាប់ប្រពៃណីដែលនាំមកពីវៀតណាម
ជំនួសឲ្យទំនៀមទម្លាប់ប្រពៃណីខ្មែរទាំងអស់ ។ វត្តអារាម គម្ពីដីកា និងព្រះសង្ឃរងការបំពានដោយការបំផ្លាញ
និងធ្វើ គុតព្រះសង្ឃ ។ ការងើបបះបោរកើតមានជាញឹកញាប់ប្រឆាំងនឹងវត្តមានអណ្ណាម និងការធ្វើទុក្ខបុកម្នេញលើព្រះពុទ្ធ
សាសនា ក៏ដូចជាប្រជាជនខ្មែរទូទាំងប្រទេស ។ គ្រានោះមានឧកញ៉ាម្នាក់បាននិយាយថា «យើងសប្បាយនឹងសម្លាប់ ជនជាតិយួន យើងលែងខ្លាចពួកយួនទៀតហើយ គ្រប់សមរភូមិរបស់យើង ពួកយើងបានចងចាំជានិច្ចនូវព្រះត្រៃ សរណគមន៍ គឺព្រះពុទ្ធ ព្រះធម៌ និងព្រះសង្ឃ» (ឆាណ្ឌល័រ, ១៩៧៣, ទំ.១៥៤) ។ រហូតមកដល់រជ្ជកាលរបស់ ព្រះអង្គដួង
ទើបគេសង្កេតឃើញថាសង្គមខ្មែរ ហាក់ដូចជាទទួលបានសន្តិភាព និងការអភិវឌ្ឍលើគ្រប់វិស័យឡើងវិញ
ក្នុងព្រះពុទ្ធសាសនាក៏ត្រូវបានស្ដារនិងពង្រឹងពង្រីកឡើងវិញផងដែរ ។ ទីអារាមដែលខូចខាតដោយសារការបំផ្លាញ
ដោយសង្គ្រាម និងដោយហេតុផងផ្សេងៗត្រូវបានជួសជុល និងកសាងឡើងវិញក្រោមព្រះរាជូបត្ថម្ភរបស់ព្រះអង្គដួង
ផ្ទាល់ ក៏ដូចជាក្រោមការជួយឧបត្ថម្ភរបស់មន្ត្រីរាជការទាំងឡាយដែលមានធនធានផងដែរ ។ គេបានរៀបរាប់ថា
នៅឆ្នាំ ១៨៥៤ ព្រះបាទសម្ដេចព្រះហរិរក្សរាមាឥស្សរាធិបតីបានទ្រង់ឈ្វេងយល់ថា ក្នុងក្រុងកម្ពុជាធិបតី
ព្រះពុទ្ធសាសនា បានទ្រុឌទ្រោមចុះ និងមិនច្បាស់លាស់ផង ត្បិតព្រះត្រៃបិដកពុំមាន ព្រះសូត្រក៏ពុំមាន
សម្រាប់ការរៀនសូត្រ ទើបព្រះអង្គបានប្រជុំសេនាបតីនាម៉ឺនសព្វមុខមន្ត្រី ត្រាស់ថា គួរចាត់មន្ត្រី១រូប
ឬអញ្ជើញព្រះរាជសារទៅស្រុកសៀម ក្រាបបង្គំទូលស្ដេចសៀម ព្រះចមក្លាវ (រាមាទី៤) ដើម្បីសូមទ្រង់តាំងព្រះត្រៃបិដក
និងគណៈធម្មយុត្តក្នុងនគរខ្មែរ ដោយនិមន្តមហា ប៉ាន ឲ្យទំនុកបម្រុងព្រះពុទ្ធសាសនាបានថ្កុំថ្កើងរុងរឿងតរៀងទៅ
។[1] អវត្តមាននៃព្រះត្រៃបិដកនៅ
ប្រទេសកម្ពុជា ត្រង់ចំណុចនេះ ប្រហែលមិនមែនជាលទ្ធផលដែលកើតឡើងដោយសារតែសង្គ្រាមជាច្រើនសតវត្សរ៍
យ៉ាងសាមញ្ញនោះទេ ។ លោក ហ្វ្រង់ស្វា ប៊ីហ្សូត៍ បានអះអាងថា មុនការស្នើសុំរបស់ព្រះអង្គដួង
នៅពាក់កណ្ដាល សតវត្សទី ១៩ នោះ នៅក្នុងប្រទេសកម្ពុជាប្រហែលជាគេមិនធ្លាប់បានយកព្រះត្រៃបិដកមកប្រើ
ឬក៏មិនស្គាល់ព្រះត្រៃ បិដកទាំងស្រុងពីដើមដល់ ចប់ ។ ទោះបីគេបានប្រើភាសាបាលី យ៉ាងទូលំទូលាយជាភាសាសាសនាតាំងពីសតវត្សទី
១៣ ហើយយើងឃើញមានភស្ដុតាងនៅក្នុងសិលាចារឹក ដូចជាពាក្យ «ព្រះវិន័យ» «ព្រះអភិធម៌» និង «ព្រះសូត្រ» នៅប្រទេស កម្ពុជាក៏ដោយ
លោក ប៊ីហ្សូត៍ ឲ្យយោបល់ថា ចំណងជើងនៃ «ល្អីបី (ព្រះត្រៃបិដក)» ទំនងជាសំដៅលើ ក្បួនសម្រាប់ព្រះសង្ឃ
ដែលក្នុងនោះ មានមន្តខ្លះ និងសេចក្ដីសង្ខេបដែលបានដកស្រង់ចេញពីគម្ពីរបាលី បម្រុង សម្រាប់ឲ្យព្រះសង្ឃសូត្រ
ប៉ុន្តែមិនចាំបាច់សិក្សា និងយល់ពីខ្លឹមសារទេ ។ បញ្ញត្តិ និងសិក្ខាបទពុទ្ធសាសនា ដូចជា
វិន័យសម្រាប់ប្រតិបត្តិនៅក្នុងវត្តជាប្រចាំថ្ងៃ ជាទូទៅ គេបានសរសេរជាអត្ថបទសម្រាយវិញ
។[2] កាលលើកឡើងរបស់
លោក ប៊ីហ្សូត៍ ទំនងជាវិភាគតែនៅស្ថានភាពមួយក្នុងសតវត្សទី១៩ ប៉ុណ្ណោះ ។
ទស្សនៈដ៏សំខាន់មួយ នៃកំណែទម្រង់ព្រះពុទ្ធសាសនា បានចាប់ផ្ដើមឡើងដោយព្រះបាទសម្ដេចព្រះហរិរក្សា
រាធិបតី ដើម្បីកត់សម្គាល់ការ ចាប់ផ្ដើមរជ្ជកាលរបស់ព្រះអង្គ គឺការប្រមូលឡើងវិញនូវគម្ពីរដែលបាត់បង់
ឬត្រូវបំផ្លិច បំផ្លាញនៅពេលមានសឹកសង្គ្រាមជាមួយនឹងសៀមនិងយួន ។ ការស្ដារគម្ពីរទាំងនោះឡើងវិញ
ជានិមិត្តរូបនៃសកម្ម ភាពមួយ ក្នុងការធ្វើបុណ្យកុសលសម្រាប់ទ្រង់ និងអាណាចក្ររបស់ព្រះអង្គ
ហើយក៏បានបង្ហាញផងដែរនូវទសពិធ រាជធម៌របស់ព្រះអង្គ ដើម្បីលើកតម្កើង និងធ្វើឲ្យសាសនាបរិសុទ្ធ
។ នេះគឺជាកាតព្វកិច្ចរបស់ព្រះអង្គ ដើម្បីការពារព្រះ ធម៌ តាមរយៈឥរិយាបថគំរូផ្ទាល់របស់ព្រះអង្គ
ក្នុងការឧបត្ថម្ភព្រះសង្ឃ និងការយកចិត្តទុកដាក់ចំពោះគម្ពីរធម៌ ។[3] ការធ្វើកំណែទម្រង់ព្រះពុទ្ធសាសនានៅឆ្នាំ
១៩០០ នោះ គឺជាលទ្ធផលនៃការធ្វើកំណែទម្រង់ក្នុងរជ្ជកាលព្រះបាទ សម្ដេចព្រះអង្គដួងនេះឯង
។ តាមពិតកំណែទម្រង់ព្រះពុទ្ធសាសនានេះមានជាដំបូងនៅប្រទេសសៀម ក្នុងរជ្ជកាល ព្រះបាទចមក្លាវ
(រាមាទី៤) ព្រោះតែព្រះអង្គកើតព្រះទ័យខ្វល់ខ្វាយអំពីសាសនាមួយនេះ ដើម្បីបង្កើតឲ្យមានភាព
បរិសុទ្ធឡើងវិញ ។ លោក ស្ដាន់លេយ៍ តាំបៀហ៍ បានរៀបរាប់ពីគំនិតនោះថា ជា «អត្ថបទធម៌អាថ៌និយម»
ដែលជាពាក្យមួយគាត់ប្រើ ដើម្បីពិពណ៌នាពីការខ្វល់ខ្វាយរបស់ព្រះមង្កុដ (ព្រះចមក្លាវ ឬរាមាទី
៤) «[…] ក្នុងការ
ស្វែងរកព្រះត្រៃបិដក ដើម្បីយល់ដឹងនូវសេចក្ដីពិតប្រាកដ បោះបង់ចោលនូវជំនឿក្លែងបន្លំ និងមន្តអាគមឱម
អាម […]» ។[4]
នៅក្នុងរជ្ជកាលព្រះបាទអង្គដួង ព្រះពុទ្ធសាសនាមានការអភិវឌ្ឍណាស់
ក្រោមព្រះរាជូបត្ថម្ភរបស់ព្រះអង្គ ផ្ទាល់ ក៏ដូចជាការចូលរួមពីសំណាក់មន្ត្រីរាជការគ្រប់លំដាប់ថ្នាក់
ព្រមទាំងប្រជាជនខ្មែរទូទៅដែលជាពុទ្ធបរិស័ទចំណុះ ជើងវត្តជិតឆ្ងាយផងដែរ ។ (ចប់ដោយសង្ខេប)
រៀបរៀងដោយ ៖ សេង សុវណ្ណដារ៉ា
(រក្សាសិទ្ធិគ្រប់យ៉ាង)
ឯកសារពិគ្រោះ ៖
១. អាដេម៉ារ ឡឺក្លែរ, ប្រវត្តិសាស្រ្ដប្រទេសកម្ពុជា, ចាប់តាំងពីសតវត្សទី
១ នៃគ្រឹះសករាជរហូតមក, ប៉ារីស, បណ្ណាគារប៉ូលហ្កឺតនែរ, ឆ្នាំ ១៩១៤,
ប្រែសម្រួលដោយ ទេព ម៉េងឃាង ហៅ ទីឃាយុ,
បណ្ណាគារអង្គរ, បោះពុម្ពលើកទី ២, ២០០៦ ។
២. ត្រឹង ងា, ប្រវត្តិសាស្រ្ដត្រឹងងា, ប្រវត្តិសាស្រ្ដខ្មែរ ភាគ
១ និងភាគ ២, សម្រាប់មធ្យមសិក្សា និងឧត្តមសិក្សា, ភ្នំពេញ, ១៩៧៣ ។
៣.
ពង្សាវតារនៃប្រទេសកម្ពុជា, ក្រសួងសិក្សាធិការ, ភ្នំពេញ, រោងពុម្ពព្រះបរមរាជវាំង,
១៩៥២ ។
៤. វង់ សុធារ៉ា និងណុប
សុខា, ប្រវត្តិសាស្រ្ដខ្មែរ,
សម្រាប់សិក្សាថ្នាក់មូលដ្ឋាន, ភ្នំពេញ, ឆ្នាំសិក្សា ២០១០-២០១១ ។
៥. ប៉ែន នុត, ប្រវត្តិសាស្រ្ដសង្ខេបអំពីទំនាក់ទំនងខ្មែរសៀម,
ភ្នំពេញ, ១៩៥៨ ។
៦. ជួន ច័ន្ទដារី,
ចាន់ ប៉ុន្នី, ដៀប សុផល, ស្រ៊ុន ប៊ុណ្ណារិទ្ធិ, ប្រវត្តិសាស្រ្ដប្រទេសកម្ពុជា, កម្មវិធីសិក្សា ថ្នាក់ឆ្នាំសិក្សាមូលដ្ឋាន,
សាកលវិទ្យាល័យជាតិគ្រប់គ្រង, ឯកសារប្រើប្រាស់ផ្ទៃក្នុង, ភ្នំពេញ, ២០០៥ ។
៧. ឃីង ហុកឌី, សុត្ដន្ដប្រីជាឥន្ទ និងស្នាដៃ,
គ្រឹះស្ថានបោះពុម្ពផ្សាយអង្គរ, ភ្នំពេញ, ២០១២ ។
៨. សាគូ សាមុត, វិរជន និងប្រវត្តិសាស្រ្ដកម្ពុជា, HOMMES ET HISTOIRE
DU CAMBODGE, (
សរសេរជាភាសាបារាំង ), គ្រឹះស្ថានបោះពុម្ពផ្សាយអង្គរ, ភ្នំពេញ, ២០១២ ។
៩. អេង សុត, ឯកសារមហាបុរសខ្មែរ,
ភ្នំពេញ, ............. ។
១០.
ដេវិឌ វ៉្យាត, ប្រវត្តិសាស្រ្ដថៃ, បកប្រែដោយ ថុល ឌីណា និងឈាត ស្រ៊ាង,
គ្រឹះស្ថានបោះពុម្ព ផ្សាយនគរវត្ត, ភ្នំពេញ, ២០១១ ។
១១.
សម័យឧដុង្គ, Wikipedia ។
១២. អ្នកស្រីត្រឹងងា, អរិយធម៌ខ្មែរ សំរាប់ថ្នាក់ទីបញ្ចប់គ្រប់ផ្នែក,
បោះពុម្ពលើកទី ៣, ភ្នំពេញ, ១៩៧៥ ។
១៣. ហួត រេចសួ, អត្ថាធិប្បាយវប្បធម៌អរិយធម៌ខ្មែរទូទៅ,
សំរាប់ថ្នាក់បញ្ចប់ និងថ្នាក់ឧត្តម, ភ្នំពេញ, ២០០០ ។
១៤. សុង ស៊ីវ, ចលនាអរិយធម៌, ភាគ ១ និង២, ភ្នំពេញ,
បោះពុម្ពលើកទី ១, ១៩៧១ ។
១៥. ស សារុន, អត្ថាធិប្បាយទស្សនៈវិជ្ជា,
សម្រាប់ថ្នាក់បញ្ចប់ និងថ្នាក់ឧត្តមសិក្សា, ភ្នំពេញ, ១៩៧៤ ។
១៦. ស សារុន, វប្បធម៌ និងអរិយធម៌ខ្មែរ,
សម្រាប់ថ្នាក់បញ្ចប់ ថ្នាក់ត្រៀមនៃឧត្តមសិក្សា, ភាគ ១ និង២,
បណ្ណាគារពន្លឺវិទ្យា, ១៩៧០ ។
១៧. យិន គឹមវាណ, ប្រភពវប្បធម៌ អរិយធម៌ ចរិតខ្មែរ,
មូលនិធិព្រះត្រៃបិដក, បោះពុម្ពលើកទី ១, ២០១០។
១៨. ខ្លូត ធីតា, ទស្សនវិជ្ជាខ្មែរសម័យចតុមុខ
លង្វែក ឧដុង្គ និងបារាំង, ភ្នំពេញ, ២០១១ ។
១៩. លាង ហាប់អាន, សិក្សាប្រវត្តិអក្សរសាស្រ្ដខ្មែរ,
សម័យនគរភ្នំ ដល់សម័យឧដុង្គ ( សតវត្សទី ១ ដល់ឆ្នាំ ១៨៥៩ ), បណ្ណាគារ គីម អេង,
ភ្នំពេញ, ១៩៦៧ ។
២០.
សូរ អឿ, ប្រវត្តិសាស្ត្រព្រះរាជាណាចក្រកម្ពុជា ជាមួយអណ្ណាម និងសៀម ចាប់ពីសតវត្សទី
១៦ ។
២១.
ដេវិឌ ឆាណ្ឌល័រ, ប្រវត្តិសាស្ត្រខ្មែរ, បកប្រែដោយ ជិន ចន្នា, ប្រាក់ សុវណ្ណរ៉ា,
ម៉ម វណ្ណារី, សេង សោត, បោះផ្សាយដោយ មជ្ឈមណ្ឌលខេមរសិក្សា, ២០០៥ ។
២២.អៀន
ហ៊ែរីស, ប្រវត្តិ និងការប្រតិបត្តិព្រះពុទ្ធសាសនានៅប្រទេសកម្ពុជា, ភាគទី១,
បកប្រែដោយ កញ្ញា ជុំ គន្ធា, លោក ហេង ស្រ៊ាង និងលោកសាន ផល្លា,
គ្រឹះស្ថានបោះពុម្ពផ្សាយនគរវត្ត, ២០១០ ។
២៣.សិក្សាចក្រ,
លេខ ៨‑៩, មជ្ឈមណ្ឌលខេមរសិក្សា, ២០០៦‑២០០៧ ។
២៤.សម្ដេចក្រុមព្រះ
ស៊ីសុវត្ថិ មុនីរ៉េត, ព្រះពុទ្ធសាសនា, ការសាកល្បងពិចារណាឲ្យយល់ជាក់, ប្រែសម្រួលដោយ
សម ថាំង, ១៩៦៧ ។
២៥.ហួត
តាត, ព្រះពុទ្ធសាសនានៅប្រទេសកម្ពុជា, សង្ខេប, ពុទ្ធសាសនបណ្ឌិត្យ, ១៩៧០ ។
២៦.ប៉ាង
ខាត់, ប្រវត្តិពុទ្ធសាសនានៅប្រទេសកម្ពុជា, ពុទ្ធសាសនបណ្ឌិត្យ, ១៩៦១ ។
២៧.សម
ញាណ, ប្រវត្តិព្រះពុទ្ធសាសនា ដែលផ្សាយចូលមកប្រទេសកម្ពុជា, ១៩៥៧ ។
២៨.ភិក្ខុ
ងិន ភេន, ហីនយាន មហាយាន, លើកទី១, ២០០៧ ។
[1] អាន ហែនស៊ែន, ការកែទម្រង់ឆ្ពោះទៅរកទំនើបនិយមក្នុងប្រវត្តិពុទ្ធសាសនាខ្មែរ,
សិក្សាចក្រ, លេខ៨‑៩, ទំព័រ ១៥៦‑១៥៧ ។
[2] អាន ហែនស៊ែន, ការកែទម្រង់ឆ្ពោះទៅរកទំនើបនិយមក្នុងប្រវត្តិពុទ្ធសាសនាខ្មែរ,
សិក្សាចក្រ, លេខ៨‑៩, ទំព័រ ១៥៧ ។
[3] អាន ហែនស៊ែន, ការកែទម្រង់ឆ្ពោះទៅរកទំនើបនិយមក្នុងប្រវត្តិពុទ្ធសាសនាខ្មែរ,
សិក្សាចក្រ, លេខ៨‑៩, ទំព័រ ១៥៦ ។
[4] អាន ហែនស៊ែន, ការកែទម្រង់ឆ្ពោះទៅរកទំនើបនិយមក្នុងប្រវត្តិពុទ្ធសាសនាខ្មែរ,
សិក្សាចក្រ, លេខ៨‑៩, ទំព័រ ១៥៩ ។
No comments:
Post a Comment