ឧកញ៉ាចក្រី កែវ
កវី
កែវ មានកំណើតនៅរវាងទស្សវត្សទី៨០ ឬ៩០នៃសតវត្សទី ១៨ ប្រសិនជាយើងសម្អាងលើកាលបរិច្ឆេទតែងនិពន្ធនៃរឿង
“ដាវរឿង” ដែលនិពន្ធឡើងនៅព.ស.២៣៨០ ម.ស.១៧៥៩ (គ.ស.១៨៣៧) នេះ ។ កវី កែវ
ទំនងជាបានរស់នៅក្នុងរជ្ជកាលព្រះនារាយណ៍រាជា អង្គអេង (១៧៧៩‑១៧៩៦), សម័យដឹកនាំដោយចៅហ្វាយ
ប៉ុក (១៧៩៦‑១៨០៥), ព្រះឧទ័យរាជា អង្គចន្ទ (១៨០៦‑១៨៣៤) ក្សត្រីអង្គ ម៉ី (១៨៣៤‑១៨៤០)
ដែលជារាជបុត្រីរបស់ព្រះឧទ័យ អង្គចន្ទ និងរជ្ជកាលព្រះបាទអង្គដួង (១៨៤០‑១៨៥៩) ផងដែរ
។ យោងតាមកាលបរិច្ឆេទនៃរឿង នាំឲ្យយើងសន្មត់បានថាលោកបានតែងរឿង “ដាវរឿង” នេះ
នៅក្នុងរាជ្យក្សត្រីអង្គ ម៉ី នាគ.ស.១៨៣៧ ។
យើងមានសេចក្ដីសោកស្ដាយណាស់ដោយពុំបានដឹងអំពីប្រវត្តិកំណើតរបស់លោកឲ្យបានប្រាកដច្បាស់លាស់
ដោយគ្រាន់តែបានស្គាល់នូវនាមរបស់លោក គោរម្យងារ និងសម័យកាលដែលលោកបានរស់នៅប៉ុណ្ណោះ ។
រីឯកាលបរិច្ឆេទកំណើត ទីកំណើត ស្រុកភូមិ នាមមាតាបិតា
ព្រមទាំងជីវភាពគ្រួសាររបស់លោកជាដើម
ហាក់បានកប់បាត់នៅក្នុងប្រវត្តិសាស្ត្របាត់សូន្យទៅហើយ ។ លោកបានបួសរៀនអក្សរ
និងលេខនព្វន្ត រៀនបាលី រៀនអានសាស្ត្រាជាដើម នៅក្នុងសំណាក់ព្រះពុទ្ធសាសនានៅវត្តអារាមនាស្រុកភូមិកំណើតរបស់លោក
។ ក្រោយមកលោកក៏បានលាចាកសិក្ខាបទ មកជាគ្រហស្ថវិញ រួចក៏បានចូលខ្លួនទៅបម្រើរាជការ
រហូតដល់ឡើងឋានៈដ៏ខ្ពង់ខ្ពស់ មានគោរម្យងារជា “ឧកញ៉ាចក្រី” ថែមទៀតផង ។ តំណែងនេះគឺជាតំណែងដ៏ធំមួយនៅក្នុងជួរមន្ត្រីរាជការនាជំនាន់នោះ
ត្បិតជាមន្ត្រីធំមួយរូបក្នុងចំណោមមន្ត្រីធំៗទាំង ៤រូប ដែលគេហៅថា មន្ត្រីចតុស្ដម្ភ
នេះឯង ។
ឧកញ៉ាចក្រី កែវ
ក្រៅពីបំពេញមុខងារនៅក្នុងកិច្ចការរាជការហើយ
លោកក៏តែងតែឆ្លៀតពេលទំនេរខ្លះៗពីកិច្ចការរាជការ ដើម្បីតាក់តែងនិពន្ធរឿង
ឬអត្ថបទផ្សេងៗដើម្បីបានជាប្រយោជន៍ដ៏ខេមរបុត្រជំនាន់ក្រោយៗបានសិក្សារៀនសូត្រ ។
តាមរយៈការសិក្សាស្រាវជ្រាវកន្លងមក យើងរកឃើញតែស្នាដៃនិពន្ធរបស់លោកតែមួយគត់ គឺ
សាស្ត្រា “ដាវរឿង” ។ សាស្ត្រានេះតែងឡើងនៅថ្ងៃសុក្រ ៧កើត ខែផល្គុណ ហេមន្តរដូវ
ឆ្នាំរកា ព.ស.២៣៨០ ម.ស.១៧៥៩ (គ.ស.១៨៣៧) ដោយមាន ពញារត្នកោសា កែវ ជួយរៀបរៀងផង ។
អ្នកនិពន្ធបានតាក់តែងរឿងនេះឡើងជាពាក្យកាព្យ ដោយប្រើបទកាកគតិ ពំនោល ព្រហ្មគតិ
និងភុង្គលីលា ។ រឿងនេះបានស្រង់ប្រភពចេញពីរឿងជាតកមួយ (តែមិនស្គាល់ឈ្មោះ) ដោយកវីក៏បានបញ្ជាក់បន្ថែមថា
រឿងដាវរឿងនេះ គឺចៅពញាស្រីអញ្ជិត ស្រី នាំមកអំពីស្រុកសៀម ។ ឯកសារជាសាស្ត្រាស្លឹករឹត
មាន ៨ខ្សែចប់ជុំជាតក ហើយរក្សាទុកនៅបណ្ណាល័យពុទ្ធសាសនបណ្ឌិត្យ ក្រុងភ្នំពេញ មាន
២គម្ពីរ ចុះលេខសាស្ត្រា ៥៤៩‑៥៥០ ។
ខាងក្រោមនេះជាសម្រង់ខ្លះៗនៃអត្ថបទផ្ដើម
និងបញ្ចប់នៃរឿង ៖
អត្ថបទផ្ដើម
: “នេះបទកាកគតិ”
អហំនមោ នមក្ការោ
អញ្ជលិយំ
សុសិរសា ពុទ្ធសេដ្ឋំ
លោកុត្តមំ
តមោនុទោ
។
នមធម្មំ សុខាវហំ
អរិយបថោ
ទេវជនំ មោក្ខមគ្គោ
សន្តិករោ
និយ្សានិកំ
។
នមសង្ឃោ វរវិសុទ្ធោ
ទក្ខិណេយ្យំ
សន្តិន្ទ្រិយ បុញ្ញក្ខេត្តំ អនាសវំ
សមិទ្ធិយោ
។
អហំរីខ្ញុំ នមោបង្គំ នមស្សការោ
ក្រួញក្រាបនមស្ការ វន្ទាសេដ្ឋោ អញ្ជលិយោ
លើកអញ្ជលី
។
សុសិរសា ផ្គូរផ្គុំហត្ថា
ដាក់ដល់សិរសី
ពុទ្ធសេដ្ឋោ វន្ទាព្រះស្រី សារពេជ្ញមុនី
ប្រសើរសួស្ដី៍សម
។ល។
អត្ថបទបញ្ចប់
: “នេះបទព្រហ្មគីត”
ភិក្ខុអើយមូលគោត កម្លៅឆោតឆុកគិតតែ
កន្ទ្រឹសឫស្យាគេ ជាទេវទត្តពុំឃ្លាតឃ្លា ។
រីនាងសម្រិទ្ធ ចេរវឹងថ្វាត់យោនយកជាតិ
ជាចិញ្ចាឯងអាច ប្រពន្ធទេវទត្តស្មោះ
។
ហៃអស់ទាំងជនផង ចូរត្រាប់ត្រង់ព្រះធម៌ថ្លៃ
ព្រះធម៌នេះគាប់ក្រៃ ចូរមហាជនគន់គិតយក ។
និទាននេះទៀងទេ តពីខ្សែប្រាំពីរមក
សំដែងចែងរិះរក តាមដោយបូណ៌បទបាលី
។
រៀងរាល់ទាល់ដល់ចប់ បរិបូណ៌គ្រប់សព្វសេចក្ដី
លុះជុំព្រះជាតី ហៅខ្សែប្រាំបីសូរេចហោង ។
រៀបរៀងដោយ ៖ សេង សុវណ្ណដារ៉ា
No comments:
Post a Comment