ឧកញ៉ាបញ្ញាធិបតី កែវ
កវី
កែវ[1]
ប្រហែលជាមានកំណើតនៅរវាងទសវត្សទី ៦០ ឬ៧០នៃសតវត្សទី១៨ ប្រសិនជាយើងសម្អាងលើកាលបរិច្ឆេទតែងនិពន្ធនៃរឿង
“សមុទ្ទឃោស” ដែលនិពន្ធឡើងនៅព.ស.២៣៦២ (គ.ស. ១៨១៨) នេះ ។ កវី កែវ ទំនងជាបានរស់នៅក្នុងរជ្ជកាលព្រះនារាយណ៍រាជា
អង្គអេង (១៧៧ ៩‑១៧៩៦), សម័យដឹកនាំដោយចៅហ្វាយ ប៉ុក (១៧៩៦‑១៨០៥), ព្រះឧទ័យរាជា
អង្គចន្ទ (១៨០៦‑១៨៣៤) ក្សត្រីអង្គ ម៉ី (១៨៣៤‑១៨៤០) ដែលជារាជបុត្រីរបស់ព្រះឧទ័យ
អង្គចន្ទ និងរជ្ជកាលព្រះបាទអង្គដួង (១៨៤០‑១៨៥៩) ផងដែរ ។ យោងតាមកាលបរិច្ឆេទតែងរឿង
នាំឲ្យយើង សន្មត់បានថាលោកបានតែងរឿង
“សមុទ្ទឃោស” នេះ នៅក្នុងរាជ្យព្រះឧទ័យរាជា អង្គចន្ទ នាគ.ស. ១៨១៨ ។
យើងឥតដឹងអំពីថ្ងៃខែឆ្នាំកំណើត
ទីកន្លែងកំណើត នាមឪពុកម្ដាយ ជីវភាពរស់នៅ
ការប្រកបកិច្ចការងារផ្សេងៗជាដើមរបស់កវីរូបនេះទេ ។
ប្រវត្តិទាំងឡាយរបស់លោកហាក់ដូចជាបានកប់បាត់នៅក្នុងទំព័រប្រវត្តិសាស្ត្របាត់សូន្យអស់ទៅហើយ
ដោយយើងអាចដឹងអំពីកវីរូបនេះត្រឹមតែនាម ក៏ដូចជាគោរម្យងាររបស់លោកក្នុងជួរមន្ត្រីរាជការតែប៉ុណ្ណោះ
ដោយមានបង្ហាញនៅក្នុងស្នាដៃនិពន្ធរបស់លោកជាតឹកតាងបញ្ជាក់ស្រាប់ ។ លោកបានបួសរៀនអក្សរ
និងលេខនព្វន្ត រៀនបាលី រៀនអានសាស្ត្រាជាដើម
នៅក្នុងសំណាក់ព្រះពុទ្ធសាសនានៅវត្តអារាមនាស្រុកភូមិកំណើតរបស់លោក ។
ក្រោយមកលោកក៏បានលាចាកសិក្ខាបទ មកជាគ្រហស្ថវិញ រួចក៏បានចូលខ្លួនទៅបម្រើរាជការ
រហូតដល់ឡើងឋានៈ មានគោរម្យងារជា
“ឧកញ៉ាបញ្ញាធិបតី[2]” ។
ឧកញ៉ាបញ្ញាធិបតី
កែវ ក្រៅពីបំពេញមុខងារនៅក្នុងកិច្ចការរាជការហើយ
លោកក៏តែងតែឆ្លៀតពេលទំនេរខ្លះៗពីកិច្ចការរាជការ ដើម្បីតាក់តែងនិពន្ធរឿង
ឬអត្ថបទផ្សេងៗដើម្បីបានជាប្រយោជន៍ដ៏ខេមរបុត្រជំនាន់ក្រោយៗបានសិក្សារៀនសូត្រ ។
តាមរយៈការសិក្សាស្រាវជ្រាវកន្លងមក យើងរកឃើញតែស្នាដៃនិពន្ធរបស់លោកតែមួយគត់ គឺ
សាស្ត្រា “សមុទ្ទឃោស” ។ សាស្ត្រានេះតែងឡើងនៅថ្ងៃសៅរ៍ ១០កើត ខែពិសាខ ព.ស.២៣៦១ (គ.ស.១៨១៨)
។ អ្នកនិពន្ធបានតាក់តែងរឿងនេះឡើងជាពាក្យកាព្យ ដោយប្រើបទកាកគតិ ពំនោល ព្រហ្មគតិ
និងភុង្គលីលា ។ រឿងនេះបានស្រង់ប្រភពចេញពីគម្ពីរហាសិបជាតក៍ ឬបញ្ញាសជាតក ។
ឯកសារជាសាស្ត្រាស្លឹករឹត មាន ២ខ្សែចប់ ដោយខ្សែទី១ មាន ២០សន្លឹក ខ្សែទី២ មាន
៣០សន្លឹក ។ សាស្ត្រារឿងនេះ ពុទ្ធសាសនបណ្ឌិត្យបានមកអំពីវត្តកោះសុទិន ខេត្តកំពង់ចាម
ចុះលេខសាស្ត្រា ៦៧១ ។[3]
ខាងក្រោមនេះជាសម្រង់ខ្លះៗនៃអត្ថបទផ្ដើម
និងបញ្ចប់នៃរឿង ៖
អត្ថបទផ្ដើម
: “នេះបទកាកគតិ”
អហំនមោ មិសិរសា
ចសម្ពុទ្ធោ
តិលោកជេជ្ឋ វិសេដ្ឋសោ មហាបញ្ញោ
បញ្ញាញាណំ
។
សត្ថាអគ្គោ លោកហិតោ ទិព្វលោកំ
សព្វសត្តេ ជនេនាថំ ទេវទេវំ
ព្រហ្មព្រហ្មា
។
........................................................................................
.........................................................................................
សុភមស្ដុ មង្គលពហុ‑ តិរេកសួស្ដី
ជយជយា វរាវរី វរកវី
កិច្ចកាព្យសាស័ទ្ទ
។
សករាជតាំងថយ ពីរពាន់បីរយ ហុកសិបមួយក្ដាត់
វិសាខមាសេ សៅរ៍វារេរត្ន ដប់កើតទៀងទាត់
អធិកមាសមាន
។
កោនុនាមា កែវកបបញ្ញា‑ ធិបតីដឹងដាន
ដឹងដោយពុទ្ធដីកា ជាក់ជាប្រធាន ទើបខ្ញុំសួរ
...............
(តក់) ? ។ល។
អត្ថបទបញ្ចប់
:
ព្រះបាទឧទុម្ពរ ដែលនៅនគរ កៃលាសមន្ទីរ
ចេរវិលវឹងមក យោនយកជាតី ចាប់ប្រតិសន្ធី
ជាព្រះមោគ្គល្លាន
។
ឯអង្គព្រះឥន្ទ ចមចៅទេវិន្ទ ប្រសើរមែនមាន
គុណនឹងពោធិ‑ សត្វវិសេសសាន្ត ឥឡូវនេះបាន
ជាអនុរុទ្ធា
។
រីទេពទេវី នាមនាងមណី វរមេខលា
ឥឡូវវិលមក យោនយកជាតិជា ឧប្បលវណ្ណា
មហាថេរី
។
ឯអង្គព្រះមហា‑ មហេសីនាមា រិន្ទមតី
ចេរវិលវឹងមក យោនយកជាតី គឺអង្គព្រះស្រី
យសន្ធរា
។
ឯអង្គសមុទ្ទ‑ ឃោសាវិសុទ្ធ គឺអង្គតថា‑
គតកាលនេះឯង សម្ដែងធម្មា សូរេចបការា
[1] តាមការយល់ឃើញរបស់លោកសាស្ត្រាចារ្យ
ឃីង ហុកឌី នៅក្នុងសៀវភៅរបស់លោកដែលមានចំណងជើងថា «មាលីបទអក្សរសិល្ប៍ខ្មែរសតវត្សទី១៩»
លោកបានបង្ហាញថា “យើងឃើញមានកវីម្នាក់នៅខាងលើនេះមាននាមកែវដែរ ហើយមានគោរម្យងារជា
បញ្ញាធិបតី បាននិពន្ធជាពាក្យកាព្យរឿងសមុទ្ទឃោសដោយទាញចេញពីគម្ពីរបញ្ញាស ជាតក
នៅពុទ្ធសករាជ ២៣៦២ គឺត្រូវនឹងគ.ស.១៨១៨/១៨១៩ គឺតាក់តែងរវាង១៩ឆ្នាំមុនរឿង ដាវរឿង ។
នេះជាហេតុឲ្យយើងចោទសួរថាតើឧកញ៉ាចក្រី«កែវ» និងបញ្ញាធិបតី «កែវ»
ជាមនុស្សតែមួយឬយ៉ាងណា? ឈ្មោះ «កែវ»
ជាចំពោះជនជាតិខ្មែរយើងគឺជាឈ្មោះដែលគេនិយមរាប់អានគឺស្មើនឹងឈ្មោះ «រតនា/រតនៈ» ឬ «រត្ន/រតន៍»ដែលជាពាក្យដែលទាញចេញពីបាលីសំស្ក្រឹត
ហើយប្រជារាស្ត្រមានចំណូលចិត្តឲ្យជានាមប្បញ្ញត្តិកូនចៅ ។ ។
តាមការសន្និដ្ឋានប្រហែលអាចជាមនុស្សតែម្នាក់ កាលនៅវ័យក្មេងសេចក្ដីមានងារត្រឹមតែ
«បញ្ញាធិបតី» ហើយ១៩ឆ្នាំក្រោយមកទើបបានឡើងងារសក្ដិជាមហាមន្ត្រី «ឧកញ៉ាចក្រី» ។ សូមអាន,
ឃីង ហុកឌី, មាលីបទអក្សរសិល្ប៍ខ្មែរសតវត្សទី១៩, ២០០៣, ទំព័រ ៧៦‑១០៣ ។
[3]
ញ៉ុក ថែម, ឯកសារសាស្ត្រាស្លឹករឹត
និងក្រាំងដែលមាននៅវិជ្ជាស្ថាននៃពុទ្ធសាសនបណ្ឌិត្យ, កម្ពុជសុរិយា, ១៩៦៥, លេខ ៩,
ទំព័រ ១០៥៧ ។
[4]
ញ៉ុក ថែម, ឯកសារសាស្ត្រាស្លឹករឹត និងក្រាំងដែលមាននៅវិជ្ជាស្ថាននៃពុទ្ធសាសនបណ្ឌិត្យ,
កម្ពុជសុរិយា, ១៩៦៥, លេខ ៩, ទំព័រ ១០៥៨‑១០៥៩ ។
No comments:
Post a Comment