រឿងទី៣០នៃរឿងកឹងកន្ត្រៃឡាវ៖
«រឿងខ្លានិងមហាឥសី,
ការវិនិច្ឆ័យក្ដីដោយគោ, ចចក, ត្មាត, ស្វា, ទេវតានិងទន្សាយ»
(Le Tigre et L’ermite,
Les Jugements du Bœuf, du Chachak, du Vautour, du Singe, du Dévata et du Lièvre)
គេនិទានថា មានខ្លាមួយបានទៅដេកនៅលើរូងពស់ដែលមានពិសមួយ ហើយពស់នេះក៏បានចឹកខ្លា
ឯខ្លាក៏បានងាប់ដោយសាររបួសនោះទៅ។ គ្រានោះមានមហាឥសីមួយអង្គបានធ្វើដំណើរបិណ្ឌបាត្រក៏បាន
ប្រទះឃើញសពខ្លាដែលដេកងាប់នៅលើរូងពស់ ដោយសារតែពិសពស់។ ដោយសេចក្ដីអាណិតចំពោះខ្លានេះ
មហាឥសីក៏បានប្ដេជ្ញាជួយសង្គ្រោះជីវិតរបស់ខ្លាកំសត់នេះ ដោយបានស្ដោះផ្លុំទៅលើរបួសត្រង់កន្លែងដែលពស់ចឹកពិសពស់ក៏ជាសះមួយរំពេច
ហើយខ្លាក៏ត្រូវប្រោះឲ្យមានជីវិតឡើងវិញ។ ប៉ុន្តែសត្វនេះ ដោយបានឃើញព្រះមហាឥសីនៅក្បែរខ្លួនវា
វាក៏កើតកំហឹងយ៉ាងខ្លាំង ព្រោះតែព្រះមហា ឥសីហ៊ានចូលមកដែនដីរបស់វានិងរំខានដំណេករបស់វា
ដោយវាបាននិយាយទៅកាន់មហាឥសីថា មហាឥសីបានចូលមកក្នុងដែនដីរបស់វា ហើយវាចង់ហែកស៊ីមហាឥសីធ្វើជា
ចំណី។ ព្រះមហាឥសីបានប្រកែកដោយបាននិយាយថា គាត់ចូលមកដែនដីរបស់ខ្លានេះ ក៏ព្រោះតែចូលមកសង្គ្រោះជីវិតរបស់ខ្លាដែរ។
ខ្លាពុំចង់ស្ដាប់នោះទេ និងបាននិយាយនៅក្នុងសិទ្ធិរបស់ខ្លួនជាខ្លាដែលនឹងត្រូវស៊ីមនុស្សដែលបានចូលមកតំបន់របស់ខ្លួន។
ព្រះមហាឥសីបានប្រកែក។ ដោយពុំអាចមានការយល់ព្រមខ្លានិងមហាឥសីក៏បាននាំគ្នាទៅរកគោ និងបានលើកនិយាយអំពីរឿងហេតុទាំងឡាយនៃការឈ្លោះគ្នានេះទៅកាន់គោ។
គោបានស្ដាប់អំពីរឿងហេតុសព្វគ្រប់អស់ហើយ
ក៏បានគិតថា ខ្លាគឺជាសត្វដ៏មានអំណាចមួយដែលនឹងសងសឹកអញ ប្រសិនបើអញពុំកាត់សេចក្ដីឲ្យខ្លាឈ្នះ។
រួចគោក៏បានសម្រេចចិត្តថាមហាឥសីពិតជាខុស ដោយបានដើរចូលទៅដែនដីរបស់ខ្លា និងសម្រេចថាខ្លាមានសិទ្ធិស៊ីមហាឥសី។
ការកាត់ក្ដីដោយគោនេះ គឺពុំមានយុត្តិធម៌ទេ។ ព្រះមហាឥសី ក៏បានទៅរកចចក។ ចចកបានសញ្ជឹងគិតថា
ខ្លារស់នៅក្នុងព្រៃដូចជាខ្លួនដែរ ហើយខ្លាក៏ជាអ្នកជិតខាងដ៏មានអំណាចថែមទៀត ចចកខ្លាចអំណាចរបស់ខ្លា
ហើយក៏សម្រេចចិត្តកាត់សេចក្ដីថាព្រះមហាឥសីខុស និងបានសម្រេចឲ្យខ្លាមានសិទ្ធិស៊ីមហាឥសី។
ការកាត់សេចក្ដី នេះគឺពុំមានយុត្តិធម៌នោះទេ។ ព្រះមហាឥសីដោយពុំចង់ឲ្យខ្លាស៊ីក៏បានទៅរកស្វា។
ស្វាចងចាំថាកាលដែលជីតារបស់ខ្លួនបានឃើញបុរសម្នាក់ធ្លាក់ទៅក្នុងរណ្ដៅមួយ ហើយជីតារបស់ស្វាក៏បានទៅយោងសង្គ្រោះបុរសម្នាក់នោះពីរណ្ដៅ
និងព្រមទាំងបានសង្គ្រោះបុរសនោះឲ្យគេចផុតពីខ្លាមួយផងដែរ ដោយបានជួយគាត់ឲ្យឡើងទៅលើដើមឈើខ្ពស់ពីខ្លា។
ប៉ុន្តែបន្តិចក្រោយមក បុរសនោះដោយពុំមានការដឹងគុណចំពោះជីតារបស់ខ្លួន ក៏បានសម្លាប់ ជីតារបស់ខ្លួន។
ដោយបាននឹកឃើញនូវរឿងហេតុដូច្នេះ ស្វាក៏បានសម្រេចចិត្តថា ខ្លាមានសិទ្ធិយ៉ាងពិតប្រាកដដើម្បីស៊ីមហាឥសី។
ការកាត់សេចក្ដីនេះពុំយុត្តិធម៌ទេ។ ព្រះមហាឥសី ដោយពុំចង់ក្លាយជាចំណីរបស់ខ្លា ក៏បានទៅរកត្មាត។
សត្វបក្សីនេះបានសញ្ជឹងគិតថា ខ្លាពុំអាចស៊ីមហាឥសីទាំងមូលនោះទេ ហើយខ្លាច្បាស់ជាចោលចំណែកណាមួយដែលខ្លួនអាចស៊ីបន្ទាប់ពីខ្លា។
ត្មាតក៏បានសម្រេចចិត្តថា ខ្លាមានសិទ្ធិដាច់ខាតត្រូវតែស៊ីមហាឥសី។ ព្រះមហាឥសីបដិសេធចំពោះការកាត់សេចក្ដីនេះ
ក៏បានទៅរកទេវតាដែលជាអ្នករក្សាដើមឈើមួយ។ ទេវតាដោយកើតកំហឹងខឹងចំពោះមនុស្សដែលតែងតែកាច់មែកឈើមួយ
ឬពីរមែកពីដើមឈើដែលគាត់រក្សាថែ ក៏បានសម្រេចការប្រឆាំងទៅនឹងមហាឥសី ព្រមទាំងបានសម្រេចចិត្តថា
ខ្លាមានសិទ្ធិដើម្បីស៊ីមហាឥសី។ ការកាត់សេចក្ដីនេះពុំមានយុត្តិធម៌នោះទេ។ មហាឥសីក៏បានទៅរកទន្សាយដើម្បីឲ្យជួយរកយុត្តិធម៌។
ទន្សាយបានស្ដាប់នូវការលើកឡើងរបស់មហាឥសីនិងខ្លា ព្រមទាំងការវិនិច្ឆ័យលើការកាត់សេចក្ដីទាំង៥
ដែលបានទម្លាក់កំហុសទៅឲ្យមហាឥសី។ ទន្សាយគិតយ៉ាងយូរ និងយល់ថាខ្លាអាចស៊ីមហាឥសីដែលបានដើរទៅដែនដីរបស់គេ
ដើម្បីប្រោះជីវិតរបស់គេឲ្យរស់ឡើងវិញ រីឯបណ្ដាអ្នកកាត់សេចក្ដីទាំងអស់នោះ ដោយមានចិត្តល្អៀងភ្លេចនូវគោលការណ៍បរិសុទ្ធ
ដែលជាកាតព្វកិច្ចរបស់ពួកគេក្នុងនាមជាអ្នកកាត់សេចក្ដីដ៏យុត្តិធម៌នោះ ដែលបង្ខំចិត្តឲ្យមានការកាត់សេចក្ដីផ្ទុយ
ទៅនឹងការពិតលើមហាឥសីដែលជាអ្នកធ្វើអំពើល្អចំពោះខ្លា។ ដោយបានពិចារណាដូច្នេះ ហើយទន្សាយក៏បានសម្រេចចិត្តក្រោមលេសថាចង់មើលកន្លែងដែលកើតហេតុ
និងធ្វើការពិនិត្យនូវសកម្មភាពដែលបានកើតឡើងកន្លងមកនោះ ដោយខ្លានិងមហាឥសីក៏បានធ្វើដំណើរទៅជាមួយនឹងទន្សាយទៅមើលនៅកន្លែងកើតហេតុ។
ពួកគេក៏បានទៅដល់កន្លែងកើតហេតុជាមួយគ្នា ហើយទន្សាយក៏បានស្នើឲ្យខ្លាទៅដេកនៅលើរូងពស់ឲ្យដូចពេលដែលមហាឥសីបានមកដល់ទីនេះ។
ខ្លាស្ដាប់តាមការណែនាំរបស់ទន្សាយក៏ទៅដេកនៅលើរូងពស់ ហើយខ្លាក៏ត្រូវពស់ចឹក និងងាប់នៅទីនោះទៅ។
«ឱ!ព្រះមហាឥសី! (ទន្សាយ និយាយទៅកាន់បុរសនេះ), អ្នកពុំដឹងទេថា ខ្លាជាសត្វរមិលគុណពីធម្មជាតិ
និងកាចសាហាវ។ វាត្រូវបានផ្តន្ទាទោសហើយនាពេលនេះ ចំពោះភាពរមើលគុណរបស់វា។ លើក ក្រោយមហាឥសីគួរតែធ្វើអំពើល្អជាមួយនឹងមនុស្សល្អ»។
ការកាត់សេចក្ដីនេះ
គឺយុត្តិធម៌៕
ប្រែសម្រួលពីសៀវភៅ «Contes Laotiens et Contes Cambodgiens» របស់លោក Adhémard Leclère
ប្រែសម្រួលជាខេមរភាសាដោយ ៖ សេង សុវណ្ណដារ៉ា
No comments:
Post a Comment